Feministaldia | Kultura Feminista Jaialdia

Feministaldia, Donostian 2005ean sortu zen Kultura Feminista Jaialdia da. Arte garaikidean eta kulturan begirada transfeminista batek kultur politikak eta zapalkuntza eta desoreka sistema zulatu ditzakeela serioki pentsatzen dugulako egiten da. Urtean behin ospatzen dugu hiriko hainbat kultur espaziotan, eta bertara leku ezberdinetako pentsalari, artista, performer, idazle, zinemagile, poeta, maga, txamana, zoro, puta, suge, DJ eta trabestiak gonbidatzen ditugu. Edizio bakoitzerako programazio-esparru gisa funtzionatzen duen izenburu edo ideia bat proposatzen dugu, mota guztietako hitzaldi, proiekzio, tarot-saio, dantza, mahai-inguru, performance eta showak antolatzeko balio diguna. Gonbidatuek Feministaldia esperimentaziorako gune gisa erabiltzea gustatzen zaigu, programatzerakoan arriskuak hartzea hot jartzen gaitu eta urtero moztu, pegatu eta birnahastearen alde gaude. Hango eta hemengo feministak, benetan zoragaria da zuekin topo egitea, astebetez burua eta gorputza elkarrekin mugitzea eta erresaka kimiko eta intelektual eder batekin esnatzea jaialdiaren ondoren. Horrek beste urte batez Feministaldia antolatzeko behar dugun indarra ematen digu.

Antolatzaileak

Jaialdia Plazandreok emakumeen plataforma politikoaren iniziatibaz sortu zen eta azken urteetan zehar kide ezberdinak egon dira bere antolakuntzan: Irene Ormazabal, Maider Zilbeti, Ainhoa Güemes, Aintzane Lasarte eta Josebe Iturrioz, besteak beste. Gaur egun Leire San Martin eta Laura Muelas-ek koordinatu eta programatzen dute, eta Irati Salsamendik darama komunikazioaren ardura. Horretaz gain, 2022ko edizioan programazio gune bat ireki da Azala espazioarekin kolaborazioan, eta beste lau pertsona batu zaizkigu taldera: Idoia Zabaleta, Mirari Echávarri, Miren Jone Lizarzaburu eta Paloma Chen.

Laura Muelas de Ayala

Laura Muelas de Ayala (Murtzia, 1984)

Ikus-entzunezkoen Errealizazioko Goi-mailako Teknikaria eta Gizarte eta Kultura Antropologiako graduatua. 2015. urtean Ikasketa Feminista eta Generoko Masterra amaitu zuen EHUn, eta plazeraren inguruko praktika feministei buruzko doktorego-tesia egiten jarraitu du ordutik. Horretan, aktibismo feministaren eta plazer-prozesuen arteko loturak nabarmentzen dira, gorputz-praktika eta praktika politiko gisa. Hainbat urtez, Madrilgo Unibertsitate Autonomoko Zinema eta Sexualitateari buruzko Jardunaldiak antolatu ditu, eta sexu-aniztasunari eta hezkuntza-jardunbideei buruzko dokumental etnografikoak egiten parte hartu du.

Gaur egun, Eihera Kooperatibako kidea da. Bertan, eraldaketa feministako eta LGTBI+ prozesuak eta proiektuak diseinatzen eta abian jartzen lan egiten du. EHUko Antropologia Feministaren Ikerketa Taldean (AFIT) kolaboratzailea da. Kultura Ikasketak eta Ikusizko Arteak (ikuspegi feministak eta cuir/queer) - MUECA Masterrean (Miguel Hernández Unibertsitatea) eta Arte Praktika eta Ikasketa Kulturalen: gorputza, afektuak, lurraldea Masterrean (UPNA eta Huarte Zentroa) irakasten du. Feministaldiaren koordinazio taldearen parte da 2020tik.

Leire San Martin Goikoetxea

Arte garaikidearen eta hezkuntzaren arteko gurutzaketan lan egiten dut testuinguru ezberdinetan. 2014 urtean Tabakalera, Kultura garaikidearen Nazioarteko Zentroan hezkuntza-arduradun izaten hasi nintzen eta urte berean Feministaldia programatu eta koordinatzera sartu nintzen. Hainbat proiektutan parte hartu dut, besteak beste, Harriak (eremuak) programaren barruan antolatu nuen "Itzuli Barik" erakusketaren komisariotza eta mediazioa; "Zinema_ilegala"-ren koordinazioa Bulegoa z/b espazioan; edo "Superbia: Ulrike Ottingerren 8 film" ziklo ibiltariaren antolaketa, Sahatsa Jauregirekin batera. 2013 eta 2016an, Donostia 2016 Europako Kultur Hiriburu programaren barruan egin zen "Bake ituna" lantaldeko kide izan nintzen "Bitartekaritzaren arkeologia bat" ikerketa martxan jarriz Sara Martinekin batera. 2022an Erromako Akademia Espainolean egoitza burutu dut, "Agujero se dice buco se parece a boca" proiektuarekin.

Irati Salsamendi Lozano

Irati Salsamendi Lozano (Donostia, 1991)

Komunikazioko Gradua eta Patroigintzako eta Jantzigintzako Goi-mailako titulua ditu pilatuta armairuan, eta orain, Haur Hezkuntzako Gradua sortara gehitzeko bidean da. Formakuntza bilduma bezain lan-ibilbide anitz eta desordenatua izan du, eta askotariko esparrutako ogibidetan aritu da: Hezkuntza formal eta ez formalean, jantzigintzan, kazetaritzan, erakunde eta enpresa komunikazioan... Mugimendu feministako kide da nerabezarotik, eta isiltasuna, urdin indigoa eta olibak maite ditu. Feministaldiko komunikazioa kudeatzen du 2021etik.

Mila esker

Feministaldian parte hartzen duten pertsona guztiek elikatzen dute jaialdia eta haiek gabe ezingo genuke urteroko egitaraua antolatu: gonbidatu guztiek, babesle eta kolaboratzaileek, eta bereziki, egitarauan parte hartzera (entzutera, iritzia ematera, dantzatzera, parre egitera) datozen pertsonek egiten dute posible espazio transfeminista honen existentzia. Horrez gain, inguruan ditugun familia, lagun eta "programatzaile-ezkutuei" esker mantentzen gara zutik eta alai Feministaldia antolatzen.

Gure babesleen artean Tabakalera, Kultura Garaikidearen Nazioarteko Zentroa, Emakunde eta Gipuzkoako Foru Aldundia aurkitzen dira. 2022an Azala Kreazio Espazioa eta Etxekalte taberna batu zaizkigu kolaboratzaileen zerrendara.